謝霆鋒賣餅　辣味曲奇試過未？

休閒

發布時間： 2015/05/26 08:04

最後更新： 2015/05/26 13:56

關於曲奇，最近有兩大新聞：謝霆鋒撈過界開曲奇店、從前一餅難求的 Jenny Bakery，因自由行旅客減少而變得「風平浪靜」。

現在是時候看看曲奇餅的最新形勢，選擇你心中的一塊曲奇。

霆鋒最新曲奇店鋒味

明星開食店不是新事，但近排最 hit 的肯定是謝霆鋒新開的曲奇店，據講每日好快便售罄，可以提早關門。其實，不論是否霆鋒的粉絲，大家都一窩蜂去朝聖趁熱鬧。

霆鋒今次同 Beyond Dessert 的幾位餅廚合作，經過反覆試味，直至霆鋒滿意才正式推出。新店剛開張，暫時只賣一款曲奇，一盒曲奇入面有齊「甜酸苦辣」4 種口味，即是牛油、檸檬、朱古力和辣椒曲奇。

霆鋒在訪問中就曾經表示，檸檬曲奇最難做，因檸檬汁酸性會令曲奇變硬，經過多翻研究後，才成功做到，食落酸味好出。

用指天椒炮製的辣味曲奇，混入了車打芝士，辣勁直達喉頭，都幾激！以 Valrhona 製作的朱古力曲奇，甘甜不膩，最好味；牛油曲奇的牛油味就嫌唔夠濃，整體來講，水準算是合格。

其他特色曲奇

同樣是藝人的陳敏之，去年底在天后開設的 Blesscuit Bakery，不足 1 年已過海在尖沙咀 K11 開分店，證明夠實力。曲奇用料講究，牛油、麵粉、海鹽及乾果等全用法國貨。曲奇款式也頗特別，如有敏之自己設計的金鑽松露曲奇、鯷魚曲奇等。

若論名氣，當然不得不提 Jenny Bakery，雖然曲奇款式大路，不離牛油、朱古力、果仁等，但鬆脆兼有牛油香，以質素取勝，旅客更視為香港手信，近年自由行旅客便大手買入，每天大排長龍，這幾個月旅客少了，反造就我們香港人可輕易買到。

謝寧及 May 姐開設的曲奇餅店也有不少支持者，前者的曲奇四重奏，曲奇口味款式頗多，如玫瑰曲奇、川椒榛子曲奇等，選擇多最合送禮用，故此逢節日前夕店子總迫滿人。May 姐的 May's Cookies，用料優質，入口鬆脆，著名的有牛油、杏仁及特濃朱古力曲奇，甚具水準。

除了具口碑的曲奇店外，也有以玩香港口味的曲奇店，在旺角的 Glory Bakery便有檸檬茶、柯華田杏仁、好立克果仁等充滿本土特色的曲奇，最特別是曲奇中加入中式粘米粉，口感更鬆脆。

鋒味

原文刊於《經濟日報》(收費閱讀)